دعوة للتوثيق بالكتابة والصور

جميلة ابراهيم السيد كتب:

سلامات طارق وكل اهل المربع الحنين وضيوف المنتدي

فكرة التوثيق رائعة وانت تعلم مدي ايماني باهمية التوثيق ... وشايفاك ذكرت الوالد ابراهيم السيد من ضمن الاسماء العددتها فوق ولك الشكر علي ذلك ... الوالد الحمد لله ما زال يتمتع بذاكرة قوية وممكن يعينك علي مهمة التوثيق لمن رحلوا ويحكي ليك عن البدايات ... انا وبحكم اني كنت دائما "لاصقة" في ابوي لدي العديد من الذكريات عن النادي القديم وبناء النادي الجديد " يمكن يكون في واحد اجد الان وايضا الجمعية التعاونية وفريق الكرة والدائما مرتبط في ذهني بعماد التنقاري ... وكيف كان كبارنا في راس الشباب يعملوا معاهم يد بيد في البناء وفتح المجاري وقت الامطار وكيف كان امهاتنا بشاركن من البيوت بعمل اطباق القراصة الشهية بالدمعة وبالتركين ... وكيف كان شباب الحلة بجهزوا ادوات الدفن ويصبوا بلاطات الخرصانة للدفن وكيف كانوا بغيثوا المحتاج .... في توثيقك اتمني ان لا تهمل الامهات الكانن يد بيد مع الاباء في كل صغيرة وكبيرة ودائما كانن خلف الكواليس حاضرين بلقمة هنئة وجردل كركدي بارد للشباب الشغالين وكيف كانوا بتشاركن في جمعيات لتجميع كل الادوات البحتاجوها الناس في الافراح والاحزان ... ودائما حاضرات بمجودهن

لو لاحظت انا بتكلم بصيغة الماضي لاني ماعندي فكرة الحاصل الان شنو واتمني لو تحكوا لينا انتوا الفي البلد اخبار اهلنا شنو ومشاريع الشباب الان شنو ولو في اي شي ممكن نقدموا للمربع .... رغم ان منزل الاسرة انتقل من عشرين ولكن كنا وما زلنا نعتبر اهل مربع عشرين اهلنا وما يجمعنا بهم اقوي من الدم

تحياتي